1 Kronieken 24
01Wat Aäron zien zeuns aangaait, dij wazzen indaild in ofdailens: zeuns van Aäron wazzen: Nadab, Abihu, Eleazar en Itamar.
02Nadab en Abihu kwammen eerder oet tied as heur voader en luiten gain kinder noa. Zodounde wazzen allenneg Eleazar en Itamar nog priester.
03David dailde heur dou veur t amtswaark in dainstplougen in. Hai dee dat mit Sadok oet femilie van Eleazar en mit Achimelech oet femilie van Itamar.
04Dou wer t dudelk dat ter meer manlu van Eleazar wazzen as van Itamar. Doarom werden zeuns van Eleazar indaild over zestien femilie-oldsten en de zeuns van Itamar over acht femilie-oldsten.
05Koppels werden indaild deur te lötten en der wer onder heur gain onderschaaid moakt, omdat ter bie de zeuns van Eleazar even zo goud as bie de zeuns van Itamar tempeloverstes, knechten van God, wazzen.
06Semaja, n zeun van Netanel, n Leviet dij schriever was, schreef de koppels op. Keunenk en zien vorsten, priesters Sadok en Achimelech, n zeun van Abjatar, en femilie-oldsten van priesters en Levieten wazzen derbie. Ieder bòt werden der twij femilies van Eleazar nomen tegen ain van Itamar.
07t Eerste löt vuil op Jojarib, t twijde op Jedaja,
08t daarde op Charim en t vaaierde op Seorim,
09t viefde op Malkia en t zèsde op Miamin,
10 t zeuvende op Hakkos en t aachtste op Abia,
11 t negende op Jesua en t tiende op Sechanja,
12 t elfde op Eljasib en t twaalfde op Jakim,
13 t dattiende op Chuppa en t vattiende op Jesebab,
14 t vieftiende op Bilga en t zestiende op Immer,
15 t zeuventiende op Chezir en t achtiende op Happisses,
16 t negentiende op Petachja en t twinnegste op Jechezkel,
17 t ainentwinnegste op Jachin en t twijentwinnegste op Gamul,
18 t drijentwinnegste op Delaja en t vaaierntwinnegste op Maäzja.
19 Zo as ze hier indaild binnen in dainstkoppels, mozzen ze veur heur toak in t hoes van de HEER goan en zok bie heur dainst holden aan de veurschriften dij Aäron, heur stamvoader, heur geven haar in opdracht van de HEER, de God van Israël.
|